၁၉ နှစ်သမီးဟန်ဆောင်၍ ထောင်ကထွက်ပြေးရန်ကြိုးစားသည့် ဘရာဇီးမူးယစ်ရာဇာ (ရုပ်သံ)

၁၉ နှစ်သမီးဟန်ဆောင်ပြီး ထောင်ကထွက်ပြေးဖို့ ကြိုးစားတဲ့ ဘရာဇီးနိုင်ငံက မူးယစ်ရာဇာတဦးဟာ စီစဉ်ထားတဲ့အတိုင်းဖြစ်မလာဘဲ ပြန်လည်ဖမ်းဆီးခြင်းခံခဲ့ရတယ်လို့ OC သတင်းမှာ ဖော်ပြပါတယ်။ ဒီဖြစ်ရပ်ဟာ ပြီးခဲ့တဲ့ သီတင်းပတ် ဘရာဇီးနိုင်ငံ ရီယိုဒီဂျနေးရိုးက နာမည်ဆိုးတဲ့ကျော်ကြားတဲ့ ထောင်တခုမှာဖြစ်ပွားခဲ့တာပါ။

ဒီလိုမျိုးရူးကြောင်ကြောင် အကြံစဉ်နဲ့ ထောင်ကထွက်ပြေးဖို့ကြိုးစားခဲ့သူကတော့ အသက် ၄၂ နှစ်အရွယ် မူးယစ်ရာဇာ ကလော်ဒီနို ဒါဆေးလ်ဗား ခေါ် ဘိုင်ရှင်ဟိုဖြစ်ပါတယ်။သူဟာ Red Command လို့ခေါ်တဲ့ မူးယစ်ဂိုဏ်းတခုရဲ့ ခေါင်းဆောင်ဖြစ်ပြီး ထောင်ဒဏ် ၇၃ နှစ် ပြစ်ဒဏ်ချမှတ်ခံထားရသူလည်း ဖြစ်ပါတယ်။

ပြီးခဲ့တဲ့ သီတင်းပတ်နှောင်းပိုင်းက ဘိုင်ရှင်ဟိုထံကို သူ့ရဲ့ အသက် ၁၉ နှစ်အရွယ်သမီးဖြစ်သူနဲ့ ကိုယ်ဝန်ဆောင်အမျိုးသမီးတဦး လာရောက်တွေ့ဆုံခဲ့ပါတယ်။  အဲဒီနောက်မှာ ဘိုင်ရှင်ဟိုဟာ သူ့သမီးကို ထောင်ထဲမှာ ထားခဲ့ပြီး ကိုယ်ဝန်ဆောင် အမျိုးသမီးဖွက်ပြီးယူဆောင်လာတဲ့ အဝတ်အစားတွေနဲ့ လူစားလဲကာ ထောင်ကနေ ထွက်ပြေးဖို့ အားထုတ်ခဲ့တာပဲဖြစ်ပါတယ်။

ဘိုင်ရှင်ဟိုဟာ သူ့သမီးမျက်နှာအတိုင်းပြုလုပ်ထားတဲ့ စီလီကွန်မျက်နှာဖုံး၊ ဆံပင်အတုတွေအပြင် ဒိုးနတ်ပုံတွေပါတဲ့ ပန်းရောင်အကျီင်္တို့ကို ဝတ်ဆင်ကာ ထောင်ထဲကနေ အောင်မြင်စွာထွက်ခွာလာနိုင်ခဲ့ပြီး အဝင်အထွက်ဂိတ်မှာ သမီးဖြစ်သူရဲ့ မှတ်ပုံတင်ကို တောင်းခံရာကနေ လုံခြုံရေးဝန်ထမ်းတွေကို သံသယဖြစ်စေခဲ့တာပဲဖြစ်ပါတယ်။


၁၉ နှစ်သမီးတယောက်လို ရုပ်ဖျက်ထားနိုင်ပေမယ့် တကယ့်တကယ် စကားပြောတဲ့အခါမှာ သူ့အသံက အစောင့်ဝန်ထမ်းတွေကို သံသယဖြစ်စေခဲ့ပြီး ခေါ်ယူစစ်ဆေးခဲ့ရာမှတဆင့် မူးယစ်ရာဇာကြီးရဲ့ လုပ်ဇာတ်တခုလုံး ဗူးပေါ်သလိုပေါ်သွားခဲ့တာပဲဖြစ်ပါတယ်။   သူ့သမီးဟာ သူ့နေရာမှာ ဝင်နေခဲ့ပြီး ကိုယ်ဝန်ဆောင်အယောင်ဆောင်ထားတဲ့ အမျိုးသမီးဖြစ်သူက အဝတ်အစားတွေကို ဖွက်ယူလာခဲ့တာလို့ ထောင်ဝန်ထမ်းတွေက မှတ်ချက်ပြုပါတယ်။ 

ဘိုင်ရှင်ဟိုကို သတိပြုမိခဲ့ပြီးနောက် ထောင်ဝန်ထမ်းတွေက သူ့ရဲ့ မျက်နှာဖုံးတွေ၊ ဆံပင်အတုတွေကို တခုချင်းချွတ်စေခဲ့ပြီး ဒီဖြစ်စဉ်ကိုလည်း ဖုန်းနဲ့ ရိုက်ကူးမှတ်တမ်း တင်နိုင်ခဲ့ပါတယ်။   ဒီဗွီဒီယိုဟာလည်း လူမူကွန်ရက်မှာ တော်တော်လေးနာမည်ကြီးနေပါတယ်။

ဒီဖြစ်စဉ်ကြောင့် ဘိုင်ရှင်ဟိုရဲ့ သမီးဖြစ်သူဟာ ထောင်းသားတွေ ထွက်ပြေးနိုင်ရေး အားပေးကူညီမှုနဲ့ အနည်းဆုံး ထောင်ဒဏ် ၂ နှစ်အထိ ကျခံရဖို့ရှိနေပြီး သူနဲ့ လိုက်ပါလာတဲ့ ကိုယ်ဝန်ဆောင်အမျိုးသမီးကတော့ စုံစမ်းစစ်ဆေးမှုတွေနဲ့ ရင်ဆိုင်နေရတယ်လို့ သိရပါတယ်။

Leave a Reply

Your email address will not be published. Required fields are marked *